Hallo Dad. Uhhh sid drei Täg hani abiz a Kriesa. D Wundheilig iwendig hani ez endlich im Griff. Puuu as paar Täg hani weh ka wia farukt aber ez hani mit da Medis abiz öpis apasst ez schwellts iwendig endlich ab und den gots aber uswendig bini immerno gschwulla. Aber wäga dem hani nid würklich as Problem das god schu. Aber meh müah hani weli eifach nüd anders als ligga kann. Waaah nei das isch furchtbar. Sust bini mi jo gwöhnt weh ha aber den kanni mi mit Keramik oder Singa oder all mini Sacha ablenka aber im Moment kanni mi mit nüd ablenka ussert am Computer im Liega schrieba. Drum schriebi gad diar. Isch eigentlich au farukt i bin genau in dera Zit krank worda wo dä Virus no garnid do gsi isch und somit hani jo schwein ka i bin genau no recht hei ko ussem Spitol wasi ez hald eifach bin isch a Risikopatient. Aber d Mam und Raphaela sind das zum Glück nid. Uiiii den hemer auno denkt wenn du ez no do wärsch das wäri nid guat gsi. Du wärsch dr allergröscht Risikopatient. Weisch wia Herz und deno Milz das wär jo garnid ganga. Drum bini gad froh das du in Sicherheit bisch. Hüd hani no a wunderschöna Bluamastruss vum Dölf kriagt. Uuuuh herzig aber alles schön nu vor Türa gleid damit miar jo kei Kontakt hend hihi. Aber han uuu Freud an dena Blüamli. Und den hani gad nomol öpis glieferet kriagt hihi. Dr Robert häd miar schön d Gitarra gflickt brocht und au schön liab nu in da Lift gstellt :-) Luschtig dia Kommunikation im Moment. So pflengend d Lüd viel meh und liabevoller Kontakt i find das super. Ez würdi au gera öpis macha aber das god eifach nid drum muasi mi fascht aso mit schrieba beknüaga. Ach jo das muas ez hald no aswili so go. Ligga muasi öpa no a Monat. Gsesch i han jo vu Afang a gseid i müasi Zwei Monat ligga das hani schu vorher gwüsst i han nunid gad grechnet dasi ins Koma keia und frisch fröhlich mit diar im Himmel umalaufa hihi. Aber das söt ma jo nid sega aber also mim beschta Willa i han das Koma schön gfunda isch jo normal also i han nonia eina kört wo gseid häd a Nahtoderfahrig segi nid schön.. Hihi drum töfi das doch schu säga. D Hauptsach isch dasi wieder zrug vum Koma bin. Und seb bini ez schu i muas nuno as paar Sächali verarbeita den got das tiptop. Sodali ez weissi gad nüd meh zum schrieba aber i tuan diar den no Fötali schicka. Küssli dis Migali..
