Hallo Dad, i han d raphaela gfrogt obi diar töf dr briaf schrieba wo sie diar an dr beerdigung vorglesa häd. Ez schriebi dä vur raphaela für di ab den häsch du dä au bi diar..
Mina allerliabschti Dad
I bin indr Nacht ufgstanda, han miar as Schnäpsli igschenkt, extra für di und han diar dä Briaf gschriba. I han mi fascht hintersinnt woni söll afanga, well as gäbti so viel woni diar wetti säga. Du weisch jo, i han schu als Meitli vor öpa allem Angst ka, aber di gröschti Angst isch gsi di irgendaswen müassa loslo. As glingt miar fascht nid. Schu als Poppi hani immer wella in dinara Nöchi si, so viel Johr häds brucht bisi den amol allei in minam eigna Bett gschlofa han. Und weni jedi Nacht gruafa han, hani törfa zu eu ko ins Grüabli go schlofa, hauptsach miar isch wohl gsi, denn isches diar au wohl gsi. Du häsch üs immer beschützt und wenn miar brüalt hend häsch üs Träna abputzt und üs wieder zum lacha brocht. I weiss no wia du üs z Velofahra bibrocht häsch, z Skifahra wiani amel wiana Rennfahreri abagflitzt bin ohni bremsa und dä mitam böögla eifach nid klappt häd. i bin nur schnell gsi, aber usgseh häds nid gad schön und du häsch di herrlich amüsiart. Z Schwimma ufam Brückli z Mallorca isch au asonas Highlith gsi, zerscht häsch gmeint i lärni das nia a morts Geduld häsch müassa ha bi miar, währends d Michaela eifach immer 2 Täg vorhär begriffa häd. Sogar dr Köpfler vum Bodestli häsch miar bibrocht, au döt mitara morts Geduld und d Michaela häds schu lengschtens könna. Z nei säga in dr Erzüchig, z Guazlibacha oder z Bastla häsch liaber dr Mam überlo. Und bi irgendöpis nei säga häsch du eifach nid übers Herz brocht. Du häsch üs eifach jeda Wunsch erfüllt, hauptsach as isch dina Maitla guad ganga. Miar alli dini 3 Wiber hend meistens Spezialwünsch und Ideea wo glaub sust kei Mensch häd, aber du häsch üs immer alli aso gno wia miar sind mit Hut und Hoor und wenns di tümmschta Idea sind. Du häsches mit dinam verschmitzta Lächla akno und gseid, jojo das isch mis Räphali so häsch du mi gnennt miar lönd sie macha, sust gid sie kei Ruah. An vielna Täg hend miar 5 mol telefoniart welli öpis han wella verzella und du häsch immer zuaglost und weni 7 mol z glicha verzellt han. Mitama Lächla häsch wieder gseid das isch mis Räphali. Spöter wos mita Enkali nid klappt häd und miar üseri Katza als Ersatz zuatua hend häsch du dia spezielli Liabi zu üserna Katza mit üs gläbt. Wenn miar das einta mol im Johr ind Feria sind und joooohhh nur 1 Wucha, welli jo schu nochama Tag Heiweh ka han, hend iar zu üserna Katza gluagt und joooh alles genau wiamers ufgschriba hend hauptsach as isch üs wohl gsi und du häsch wieder glächlet und gfunda so stimmts für z Räphali. Z Grilliara bi üs ufam Balkon häsch du gliabt oder z Chinoise ässa im Pöschtli mit üs allna und natürlich am Rolli und dr Helen das isch für di z Gröschta gsi. Natürlich an anderna viela Orta go ässa und a gselliga Obig z ha häd di glücklich gmacht. Nocham ässa häd as Schnäpsli vum Rolli mit miar und am Patrick joooh nia töfa fehla oder den eba 2 oder 3 oder 4. Je meh desto besser, obwohl i den fascht unterem Tisch gsi bin und miar Träna glachend häd zäma. Z letschta mol an Wiahnachta. Dia letschta 5 Johr häsch du diar leider immer meh Gedanka kmacht wägem älter werda, obwohl du üs das nia mitteilt häsch aber miar hends gspührt. Immer meh sind Fründa vu diar inda Himmel ganga mit dem bisch du nid aso z recht ko. Miar könnts fascht nid glauba das du jetzt nüma bi üs bisch, as fallt üs so schwär zum di go lo aber miar sind dankbar häsch du törfa aso go ohni weh z ha und müassa lieda. Ama wunderschöna Tag im Sessali näb dr Mam das isch perfekt gsi für di. An dem hebend miar üs jetzt ganz fescht. Mina überalles gliabta Dad i bin so dankbar häsch ddu mi 37 Johr beschützt und begleitet. I weiss du machsch das jetzt als Engel aso witer. I liaba di überalles, üs trennt nüd, miar sind immer verbunda. I versprächa diar miar luagend guat zur Mam und probiarend bald wieder fröhlich z si, damit du au kasch glücklich si. Nur grad im Moment nonid. Gnüss dini Festli mit dina Fründa im Himmel.
In ewiger Liabi
dis Räphali..
Schön häd sies gschrieba gell und alli Detail i weiss auno alles. Gsesch miar vergessend dia nia..
Dis Migali..
